Республикада мондый хәлнең булганы юк иде әле: Мамадыш районының Бөрсет Сукачы авылында биредә туып үскән, Чаллы шәһәрендәге азык-төлек кибетләре челтәре хуҗасы Равия Зыярова акчасына башлангыч мәктәп төзелә башлады.
Үсәли авыл җирлеге (Бөрсет Сукачы шунда керә) башлыгы Әлмир Зыятдинов сүзләренчә, авыл мәктәбе авария хәлендә булу сәбәпле, 2008 елда ябыла. Балалар Үсәли авылы мәктәбенә йөреп укый башлый. Ә 2012 елда иске мәктәптә ут чыгып, бина тулысынча янып бетә. Шул ук вакытта соңгы елларда авылда яңа туган сабыйларның саны артканнан-арта бара. Хәзерге вакытта биредә мәктәпкәчә яшьтәге 18 бала исәпләнә (барлыгы - 46 бала), шуңа күрә авылда яңа мәктәп кирәклеге көн кебек ачык, анда балалар бакчасы да булса – тагын да яхшы.
Авылдагы демографик вәзгыятьне исәпкә алып, авылны Мамадыш районының 2020 елга кадәр исәпләнгән үсеш программасына керттеләр, аның кысаларында биредә яңа социаль объект сафка басарга тиеш. Ләкин моның кайчан гамәлгә ашырылачагы билгесез... Ә балалар буйга җитеп килә!
Равия Зыяровага, бюджеттан финанслауны көтеп тормыйча, мәктәп салу идеясе Бөрсет Сукачы авылында моннан алдарак аның акчасына сафка баскан социаль объект - фельдшер-акушерлык пункты ачылганнан соң килә. Элеккеге медпункт иске мәктәп бинасында урнашкан була, янгыннан соң фельдшерга авылдашларын үз өендә кабул итәргә туры килә. Яңа фельдшер-акушерлык пункты ачу мәсьәләсе һавада эленеп кала: чөнки авыл кечкенә (биредә 70 кә якын хуҗалык исәпләнә) һәм өстәгеләр бирегә акча кертүнең файдасы булмаячак дип уйларга мөмкин. Моңа кадәр җирле мәчетне ремонтлауда иганәчелек ярдәме күрсәткән Зыярова авылдашлары турында үзе кайгыртырга карар кыла.
- Ул бик мәрхәмәтле хатын-кыз, бик дини кеше, башкаларга ярдәм итү теләге белән яна, - дип сөйли хәйрияче якташы турында авыл җирлеге башлыгы Әлмир Зыятдинов. - Акушерлык пунктын төзү эшләре минем күзәтчелек астында алып барылды, материаллар сатып алу, эшчеләргә хезмәт хакы түләү белән бергә ул 780 мең сумга төште. Соңыннан Равия Нургали кызы аны тулысынча үз акчасына җиһазландырды. Узган елның декабрендә фельдшер-акушерлык пунктын ачканда Равия ханым авылда клуб белән бер түбә астында мәктәп төзергә теләк белдерде... Күптән түгел без бу объектның нигезен салдык. Ул ике сыйныф-комплектка исәпләнгән, гомуми мәйданы 192 квадрат метр тәшкил иткән бер катлы кирпеч бина булачак. Анда эшләр өчен укытучыларыбыз бар. Мәктәпне быел файдалануга тапшыру теләге белән янабыз.
Район мәгариф идарәсендә дә яңа мәктәпне кадрлар белән тәэмин итүдә проблемалар булмаячак, дип ышандырдылар.
- Анда ике укытучы, шулай ук аш пешерүче һәм җыештыручы эшләр дип уйлыйбыз, - дип хәбәр итте Мамадыш районы Башкарма комитетының мәгариф бүлеге җитәкчесе Вәзир Фәизов. - Без инде директор урынына да кеше таптык - ул ябылган мәктәпнең элеккеге хезмәткәре. Сыйныфлар балалар өчен уңайлы булсын өчен, ул безнең исемнән төзелешнең барышына күзәтчелек итәчәк. Төзелеш эшләрен 1 сентябрьгә төгәлләргә ниятлиләр. 8 баланың әти-әнисе балаларын шунда бирергә теләк белдерде инде. Бу бинада балалар бакчасы да урнашса яхшы булыр иде, ләкин әлегә моны ничек гамәлгә ашырырга икәнлеген белмибез, чөнки мәктәпкәчә яшьтәге балалар өчен төзелгән биналарга таләпләр бик катгый... Мин иганәче акчасына мәктәп төзелүгә бәйле бер очракны да хәтерләмим. Без моңа бик шат һәм ярдәм итәргә әзер торабыз.
Хәбәрчебез Равия Зыярова белән дә элемтәгә керде. Ул бик тыйнак кеше булып чыкты һәм мәктәп төзелеше хакында фикер алышудан катгый рәвештә баш тартты, моны үзем турында газеталарда язсыннар өчен эшләмим дип белдерде. Янәсе, төзелеш эшләре әле башланды гына бит, сөйләр әйбер дә юк. Шулай да ул авыл мәктәпләрен саклау һәм яңадан торгызуның әһәмиятен ассызыклады.
- Мәктәп – ул авыл тормышының мәдәни һәм иҗтимагый үзәге, мәктәп юк икән, димәк, авылның да киләчәге юк.
Татарстанда авыл мәктәпләренең саны кимү динамикасы:
Уку елы
|
Мәктәпләр саны
|
Укучылар саны
|
2008/2009
|
1775
|
111 337
|
2009/2010
|
1728
|
105 828
|
2010/2011
|
1607
|
99 573
|
2011/2012
|
1379
|
93 856
|
Комментариев нет:
Отправить комментарий